Nan tan lontan, lè lekòl pral louvri, preparasyon paran yo pa t sèlman konsène inifòm, soulye, liv ak lòt materyèl lekòl. Pou anpil fanmi ayisyen, se te yon moman espesyal kote yo te pran tan pou prepare pitit yo pou nouvo ane akademik la.
Anpil fanmi te konn pran swen pou bay timoun yo medikaman, benyen yo, pran swen sante yo epi fè tout sa yo te konsidere ki te kapab ede yo kòmanse ane lekòl la nan bon kondisyon.
Pou fanmi ki te pratike lafwa, preparasyon an te gen yon dimansyon espirityèl tou. Gen paran ki te konn fè jèn ak lapriyè pandan plizyè jou, pafwa pandan sèt jou, pou mande pwoteksyon ak benediksyon pou pitit yo pandan tout ane lekòl la.
Se te yon fason pou paran yo di: “Nou pa konnen sa ane a ap pote, men n ap mete pitit nou yo nan men Bondye.”
Jodi a, anpil nan abitid sa yo sanble ap disparèt. Paran yo gen mwens tan pou yo konsakre ak kalite preparasyon sa yo. Presyon lavi a, travay, difikilte ekonomik, pwoblèm sekirite ak anpil lòt responsablite fè preparasyon pou lekòl la vin plis konsantre sou sa ki nesesè pou timoun nan antre nan klas: peye lekòl, achte inifòm, liv, soulye ak materyèl.
Men, malgre tout chanjman sa yo, petèt gen yon bagay nou pa ta dwe pèdi: tan nou pran pou prepare pitit nou yo non sèlman pou lekòl, men pou lavi.
Paske yon nouvo ane akademik pa sèlman mande yon sakado ak liv. Li mande ankourajman, sipò, konsèy, prezans paran yo epi, pou moun ki kwè, lapriyè tou.
Anvan, preparasyon pou lekòl te yon moman fanmi. Jodi a, lavi fè nou prese. Men èske nou pa ta dwe jwenn yon ti tan ankò pou nou prepare pitit nou yo jan nou te konn fè l lontan?
📲 Ne ratez rien avec Potomitanm
Recevez directement nos dernières nouvelles sur votre téléphone via notre chaîne WhatsApp officielle.
🚀 Rejoindre la chaîne WhatsApp Potomitanm